Lippi do të zëvendësojë Ancelottin?
Siç shkruan Gazzetta dello Sport, Marcello Lippi mund të zëvendësojë Carlo Ancelottin në stolin e trajnerit të Milanit, nëse kampioni evropian nuk arrin të kualifikohet së paku në gjysmëfinale të Ligës së Kampionëve.

Ancelotti ka qenë një prej trajnerëve më të suksesshëm në historinë e rosonerëve dhe ka një rekord të thjeshtë në Evropë, duke arritur në tre finale të Ligës së Kampionëve (dy prej të cilave të fituara), një gjysmëfinale dhe një çerekfinale në pesë vitet e fundit.

Ai po ashtu ka sjellë në Milan tre trofe gjatë 12 muajve të fundit, duke e plotësuar trofeun e Ligës së Kampionëve edhe me Superkupën Evropiane dhe Kupën Botërore të Klubeve. Megjithatë, Ancelotti mund të humb punën e tij në fund të sezonit, nëse ai nuk arrin ta përsërisë suksesin e tij në garën evropiane.

Marcello Lippi përmendet si zëvendësim i mundshëm i trajnerit aktual. Lippi, i cili ka qenë i papunë që nga triumfi në Kupën Botërore 2006 në Gjermani, ka deklaruar disa herë se ai do t’i kthehet punës gjatë sezonit të ardhshëm.

Sipas Gazzetta dello Sport, Ancelotti do të mund të ruajë vendin e tij vetëm falë një suksesi në Ligën e Kampionëve.